ЕЖЕ НЕ ЗАБЫВАТИ УЧИТЕЛЕЙ
Аще кто велик святитель или малы, рекше попове, душеполезному разуму и хитрому
сведению навык, и в разум истинный прийти и иных научити, то аще будет научился
и от мужа проста, рекше не от иереа, то держать ему его в своем сердци и в души
и уме в незабывную память до исхода души своея, имя его со своим именем в
молитвах и в всяком святом поминании, не токмо в дневных, но и в нощных молбах.
Аще ли того в забыть положит или небрежением не въсхощет поминати в молитвах яже
к Богу, или некыя ради зависти, то своя ему молитва неприатна есть, аще таковый
свят есть, понеже ему путь показал есть, ведущий в жизнь вечную, и дверь отворил
райскую видением поведаниа, и ключа дал разума книжнаго. Да не мози никтоже имай
разум сверьшен сея заповеди преступити, да и сам не преступиши того пути учениа,
и в погибель не внидеши, мнози бо не въсхотеша рченаго деяти и погибоша. Нужа де
же есть исповедати о инех слово велико; мы же научимся от Павловы повести, иже
рече к Тимофею: Благости навык, трезв сый в[о] всем доброю совестию, и в
святительскую подобу облечеся, почерпъл еси от сосуда избраннаго неизреченнаа. И
ведый буди, от кого навыкл еси, яко измлада святаа книги умееши, могущаа тя
умудрити в спасение, верующаа в Святую Троицу - Отца и Сына и Святаго Духа.
Добрый бо человек от добраа сокровища износит добраа, а злый - от злаго злая.
Яже не помянет, откуду что добра приемще, ти подобни суть псу гладному и зимою
измеръзшу, и потом согрет и накорьмлен, и нача лаяти на съгревшего и
накормившаго и.
История Беларуси IX - XVIII веков. Первоисточники. || Кирилл Туровский. Росс.
нац. библ. Рукопись Царск. № 371. Л. 346об.- 347.
СЛОВО О ПРЕМУДРОСТИ ПРИТЧА
Первое, брате, коея мудрости ищеши? Господь рече: Луче есть искати кротости,
нежели мудрости. Кротость бо есть мати мудрости, и разуму, и помыслу благу, и
всем добрым делом. Да аще обрящеши первое матерь, тогда мати дети к себе
привабить, и тебе будуть братья; с тою же братьею обрящеши собе Отца, то же ся
Отець родил от Своего Отца преже всех век и пакы пришед в последняя лета, нас
породи святым крещениемь и верою сыны себе створи, и облече ны в чистыя и
красныя одежа. Да аще будем разгневали Отца, искалявше одежа крестьныя; ты же ли
рци, кая искаляхом, и аз ти отвещаю: отбиахом от себе матерь, а мачеху прияхом,
ейже имя величанье. Дети же //48об. ея суть: гордость, непокорение, прекословье,
презорьство, хула, клевета, зломыслье, гнев, вражда, пьянство, игры неприязнины
и всякая злоба. Да аще хощеши матере ся лишити, а мачеху любити и ея дети, то с
теми обрящеши собе гордаго дьявола, вязящаго в тме кромешней и в огни
негасимемь, идеже и ты будеши привязан с нимь. Аще не отженеши от себе мачехы и
ея дети и то не приимеши матере с детми ея, то будеть ти последняя горша первых.
Ты же ми рци: како могу прияти матерь, а отца разгневив, а порты хрестьяныя
искаляв? - Аз же тя, брате, научю: порты искаляныя измый, и тогда тя прииметь
отець и начнеть тя любити паче первыя любве. Порты же суть крещение, вера, а кал
- клевета, хула, осуженье, гневь, //49 прекословье, сваръ, бой, зависть, вражда,
злу поминанье, непокорение, злосердие, злии помысли, смехотворение и вся игры
бесовьскыя, таже пакы запойство, резоиманье, грабленье, разбой, татба,
душегубьство, потвори, поклеп, вълхвования, чародеяния, прелюбодеянья и всяка
злоба; всего же того горее есть гордость, и еже есть всему тому мати.
Аще прииму матерь, реченую кротость, то чимь могу искаляныя порты омыти? И аз тя
научю: омыеши страхомь Божиемь, и верою чистою, и смерениемь, покаяниемь и
молитвою, слезами и постомь, поклономь и милостынею, и любовию, к всем мир,
въздержание, терпенье, послушание добраго учение, покоренье, бденье,
трезвьствомь и всеми добрыми делы; паче же всего того луче есть //49об. кротость
добрая, еже есть всему добру мати. Да аще будеши послушлив и умякчиши землю
сердечную и приимеши малое семя и расплодиши в собе многоспасенаго жита, яко
будет не мочи в душевнемь дому всего того положити, нъ инем будеши раздавая
требующим того же: первое - притчам разрешение книжным, потом - неразумным
словомь разрешение и всему Писанью толкование; та же, аще хощеши, недоведомомь
числом съчтанья, та же обилья телесней кормли и здоровья, та же будущаго века се
есть спасеное жито, егоже, рече, очи не видеста, ни уши слышаста и на серце
человеку не взиде, еже уготова Бог любящим Его о Христе Иисусе Господе нашемь,
Емуже слава въвек!
История Беларуси IX - XVIII веков. Первоисточники. || Кирилл Туровский.
"Соборник" XIII в. Росс. нац. библ. F.n.I. 39. Л.48-49об.